Monday, October 5, 2009

കണ്ണാ നീയെന്നെ മറക്കല്ലേ കണ്ണാ




കണ്ണാ നീയെന്നെ മറക്കല്ലേ കണ്ണാ


കണ്ണാ നീയെന്നെ മറക്കല്ലേ കണ്ണാ
കണ്ണാ നീയെന്നെ വെറുക്കല്ലേ കണ്ണാ
നീയല്ലാതെനിക്കൊരു സാരഥിയില്ലാ
നീയില്ലാതെനിക്കൊരു വിജയവുമില്ലാ


പാര്‍ത്ഥന്‍റെ സാരഥിയായ കണ്ണാ
പൈയ്ക്കളെ മേയിച്ചു നടന്ന കണ്ണാ
കാളിന്ദി തീരത്ത് കാമിനിമാരുമായ്
കളിച്ചും ചിരിച്ചും നടന്ന കണ്ണാ


കണ്ണനെ സ്നേഹിച്ച ഗോപികമാരുടെ
കനവിനെ തകര്‍ത്തൊരു കള്ളനല്ലേ

രാധതന്‍ മാനസം കവര്‍ന്ന നീ അന്നെത്ര
ഗോപികമാരുടെ മനം തകര്‍ത്തു


പാര്‍ത്ഥന്‍റെ തേരില്‍ നീ സാരഥിയായ്
ഗീതോപദേശങ്ങള്‍ നല്‍കിയില്ലേ

കംസനെ വധിച്ചു തുടങ്ങിയ അങ്കത്തില്‍
കൌരവപ്പടയും തോറ്റൊടുങ്ങി

കണ്ണാ നിന്‍ സാമീപ്യം തേടി ഞാനെന്നും
കൃഷ്ണന്‍റെ കോവിലില്‍ തൊഴുതിടുന്നു

അമ്പല മുറ്റത്തു കൊളുത്തിയാ നെയ്ത്തിരി
ഇന്നെന്‍റെ മനസിന്‍റെ ദീപമായി


മാനത്തു മഴക്കാറു കാണുമ്പോള്‍ നീയെന്‍റെ
മനസിലേയ്ക്കെത്തുന്നു മാരിവില്ലായ്
മഴ പെയ്തൊഴിയുമ്പോള്‍ മാനം തെളിയുമ്പോള്‍
മനസിലെ ഭാരവും പെയ്തൊഴിയും


കണ്ണാ നീയെന്നെ മറക്കല്ലേ കണ്ണാ
കണ്ണാ നീയെന്നെ വെറുക്കല്ലേ കണ്ണാ
നീയല്ലാതെനിക്കൊരു സാരഥിയില്ലാ
നീയില്ലാതെനിക്കൊരു വിജയവുമില്ലാ

ജോഷി പുലിക്കൂട്ടില്‍ copyright©joshypulikootil

Thursday, October 1, 2009

നിലാവിന്‍റെ സംഗീതം


നിലാവിന്‍റെ സംഗീതം

ഈ നീലരാവിന്‍റെ ഈറന്‍ പുതപ്പില്‍ ഞാന്‍
ഇന്നിതാ സംഗീതം കേട്ടിടുന്നു
ഈറനുടുത്തു നീ വന്നിങ്ങു നില്‍ക്കുമ്പോള്‍
ഇന്നെന്‍റെ മാനസം നിറഞ്ഞിടുന്നു

അന്നു നീ പാടിയ പാട്ടിന്‍റെയീണം
ഇന്നുമെന്‍ കാതില്‍ മുഴങ്ങിടുന്നു
ഇന്നിതാ ഞാനാ പാട്ടിന്‍റെയീരടി
എന്‍റെ മനസോടു മന്ത്രിക്കുന്നു

നേരം വെളുക്കുമ്പോള്‍ കൂവുന്ന കോഴിയും
നേരം മയങ്ങുമ്പോള്‍ മൂളുന്ന മൂങ്ങയും
എന്നുടെയാമോദം തല്ലിക്കെടുത്തുവാന്‍
ഇന്നിതാ പെയ്യുന്ന പേമാരിയും

സരയൂ നദിയുടെ തീരത്തു നിന്നു ഞാന്‍
സംഗീതമിന്നും കേട്ടിടുന്നു
ഓളങ്ങള്‍ മൂളുന്ന നദിയുടെ താളവും
ഓമലിന്‍ താളവുമൊന്നു പോലെ

എത്രയോ നാളായാ പാട്ടിന്‍റെയീണം
എന്നുടെ ഹൃത്തിന്‍റെ താളമാക്കി
നിന്നിലെ സംഗീതം നില്‍ക്കുന്ന വേളയില്‍
എന്നിലെ സ്പന്ദനം നിന്നിടുന്നു

ആ നേരം ഈ ഭൂമി മൂകമാകും
ആ നേരം നമ്മളും മൂകരാകും
ആകാശമീതെ മാലാഖമാര്‍
ആയിരം ഗീതങ്ങള്‍ പാടുമന്ന്
ആ ഗാനം കേള്‍ക്കാനായ് കാത്തിരിക്കാം
ആയിരം ജന്മങ്ങള്‍ കാത്തിരിക്കാം




ജോഷി പുലിക്കൂട്ടില്‍
copyright©joshypulikootil