Saturday, October 22, 2016

കാണാ ക്കിനാവുകള്‍



കല്ലായിപ്പുഴയിലെ കവിത പോലെ
കാണാക്കുയിലിന്‍റെ കുറുകല്‍ പോലെ
എന്നുള്ളിലെന്നും അലയടിയ്ക്കും
നിന്നനുരാഗത്തിന്‍ പാരിജാതം

സൂര്യനെ ചുറ്റും ഗ്രഹങ്ങള്‍ പോലെ
ഭൂമിയെ ചുറ്റുന്ന ചന്ദ്രന്‍ പോലെ
എന്‍റെ കനവിന്‍റെ ചക്കിനുള്ളില്‍
നീയെന്നുമെന്നും കറങ്ങീടുന്നു

തീരത്തിനവകാശം തിരകളെന്നും
പൗര്‍ണ്ണമിക്കവകാശം ചന്ദ്രനെന്നും
ഓളത്തിനവകാശം പുഴയ്ക്കു സ്വന്തം
കണ്മണിക്കവകാശം എനിക്കു സ്വന്തം

എന്നാളുമെന്നാളും നിന്നെ നോക്കി
ആയിരം സ്വപ്‌നങ്ങള്‍ കണ്ടിരുന്നു
നാളെയാ സ്വപ്‌നങ്ങള്‍ പൂവണിയും
നീളെ നീളെയാ നാളെയെന്നും

എങ്കിലും സ്വപ്നത്തിന്‍ ചിറകിലേറി
ഒരുപാടു ദൂരം ഞാന്‍ പോയിടുന്നു
നാള്‍ തോറും ആ ദൂരം കൂടിടുന്നു
സ്വപ്നത്തിനവകാശം എനിക്കു സ്വന്തം
സ്വപ്നത്തിനവകാശി ഞാന്‍ മാത്രം

ജോഷിപുലിക്കൂട്ടില്‍

copyright©joshypulikootil

മരണമെത്തുന്ന നേരം




എനിക്കാരുമില്ലാതെ പോയി 
ഞാനേകനായന്നു പോയി 
മരണത്തിൻ വിളി കേട്ടു ഞാനോ
മറുവാക്കു മിണ്ടാതെ പോയി 

മരവിച്ചു കിടക്കുന്ന നേരം 
മായ്ക്കുന്നു ലോകത്തിൻ മുന്നിൽ
എന്റെ വിയർപ്പിന്റെ ഗന്ധം
വാസനാ തൈലങ്ങൾ പൂശി 

പൂവിനെ സ്നേഹിച്ചയെന്നെ
പൂക്കളാൽ മൂടുന്നു നിങ്ങൾ 
പിരിയുന്നു ഞാനിന്നു ലോകം 
പൂക്കളാനിന്നെന്റെ തോഴർ 

ഞാനേകെനായിന്ന് പോകും നേര 
മെന്നോടു ചേർന്നവരെല്ലാം
എന്നെ പിരിയുന്ന നേരം 
തോരാതെ കണ്ണീരു വാർക്കും

മരണത്തിൻ മണിമഞ്ചമേറി
മണ്ണിലേക്കായ് ഞാൻ മടങ്ങും ,നേരം 
മൂകനായ്‌ യാത്ര പറയുന്നെരെന്നെ
മണ്ണിട്ടു നിങ്ങൾ മടങ്ങും 

ദിവസങ്ങൾ മുന്നോട്ടു നീങ്ങും നേരം 
ദു:ഖങ്ങൾ മറക്കുന്ന ലോകം 
ഇന്നിന്റെ തിരക്കിന്റെയുള്ളിൽ 
എന്നെ മറക്കുന്നു ലോകം 

ചുവരിലെ ചിത്രമായ്‌ മാറി
ചുരുങ്ങിയ ദിവസങ്ങൾക്കുള്ളിൽ
മൂകനായ്‌ ഞാനപ്പോൾ ചൊല്ലും 
ഇന്നു ഞാൻ നാളെ നീ , സത്യം.


ജോഷി പുലിക്കൂട്ടില്‍
copyright©joshypulikootil

Monday, September 9, 2013

ഓണക്കാലം

 

 
ഓണക്കാലം

കുയിലേ കള്ളി പൂങ്കുയിലേ
ഓണം വന്നതറിഞ്ഞില്ലേ
തേന്മാവിൻ ചെറുചില്ലയിൽ നീ
എന്തേ ഇന്നും വന്നില്ലാ

അത്തം പിറന്നതറിഞ്ഞില്ലേ
തുമ്പികൾ പാറി നടക്കുന്നു
വണ്ടുകൾ മൂളി പായുന്നു ...
എന്തേ നീയിതിറിഞ്ഞില്ലാ

ഊഞ്ഞാലാടും ബാലന്മാർ
പൂക്കളിറുക്കും ബാലികമാർ
വഞ്ചിപ്പാട്ടിൻ ഈണത്തിൽ
തെന്നിപ്പായും ഓടങ്ങൾ

തിരുവാതിരയും പൂവിളിയും
അത്തചമയവും പുലികളിയും
എന്തേ നിന്നെ കണ്ടില്ലാ
കള്ളിക്കുയിലെ പൂങ്കുയിലേ

ചേനക്കറിയും ചെറുപയറും
പാലടയും പാൽപ്പായസവും
എല്ലാമൊരുക്കി കഴിഞ്ഞല്ലോ
എന്തേ നിന്നെ കണ്ടില്ലാ

ആർപ്പോ ഇറോ വിളികളുമായി
ഓണത്തപ്പൻ വന്നല്ലോ
കുരവയിടുന്നു അംഗനമാർ
കുട്ടികൾ തുള്ളി ചാടുന്നു

തേന്മാവിൻ ചെറു ചില്ലയിൽ നിന്നും
പൂങ്കുയിൽ നീട്ടി പാടുന്നു
'' മാവേലി നാടു വാണീടും കാലം
മാനുഷരെല്ലാരും ഒന്ന് പോലെ ''

ജോഷി പുലിക്കൂട്ടിൽ

Tuesday, May 21, 2013

തെറ്റിന്റെ ശരി

തെറ്റിന്റെ ശരി





അമ്മ തൻ നെഞ്ചിൻ നേരിപ്പോടിനുള്ളിലെ
ചൂടേറ്റു ഞാനന്നുറങ്ങി
കത്തും വിശപ്പിന്റെ ചൂടിനാലമ്മ തൻ
നെഞ്ചന്നു നീറി പുകഞ്ഞിരുന്നു

കോരിച്ചൊരിയുന്ന പേമാരിയും പിന്നെ
കൂടെ മുഴങ്ങുന്ന ശബ്ദ ഘോഷങ്ങളും ..
മാറത്തു ചേർത്തു പിടിച്ചൊരാ മാതാവിൻ
മാറാപ്പിനുള്ളിൽ ഞാൻ ഉറങ്ങിയല്ലോ

ഒരു ചാണ്‍ വയറിന്റെ പശിയോന്നടക്കുവാൻ
ഒരു നേരം തന്നെ വില്ക്കുന്ന സ്ത്രീത്വം
കത്തുന്ന വയറിന്റെ തീയൊന്നണയ്ക്കുവാൻ
ഉടുമുണ്ടഴിക്കുന്ന തെരുവിന്റെ മക്കളോ

കത്തുന്ന കാമത്തിൻ കനലൊന്നണയ്ക്കുവാൻ
കണവനെ മറക്കുന്ന കൊച്ചമ്മമാരോ
ഏതാണ് തെറ്റെന്നറിഞ്ഞു കൊണ്ടും
തെറ്റിനെ ചുമക്കുന്നു മാലോകരെല്ലാം

വേറിട്ട ജന്മങ്ങൾ കണ്ടു കൊണ്ടന്നങ്ങ്
വെറുതെ നടന്നു ഞാൻ ബാലികയായ്
കൌമാരം പിന്നിട്ടയെന്നെ ഉഴിയുന്നു
കാമം തുളുമ്പുന്ന കണ്ണുകളാൽ

തെരുവിന്റെ സന്തതി എന്നൊരാ പേരിലായ്
തെണ്ടിയായ് കാണും വരേണ്യ വർഗങ്ങളും
പിന്നിട്ട കാലത്തിൻ കാലൊച്ച കേൾക്കാതെ
എന്നെ മറയ്ക്കുന്ന എന്റെ സൗന്ദര്യവും ..

എല്ലാമെനിക്കന്നു നല്കീ ലോകത്തിൽ
ആരും കൊതിച്ചിടും ജീവ സൌഭാഗ്യങ്ങൾ
മണ്ണിൻ മടിയിലെ നേരിപ്പോടിനുള്ളിൽ ഞാൻ
എല്ലാമുപേക്ഷിച്ചു പോകുന്ന നേരത്തും

ഏതാണ് ശരിയെന്നറിയാതെയെന്നും
തെറ്റിനെ ശരിയാക്കും മാനവവർഗമേ
ശരിയേതു തെറ്റെന്നറിയാതെ ഞാനിതാ
പോകുന്നു മണ്ണിൻ നേരിപ്പോടിന്നുള്ളിലായ് ......

ജോഷി പുലിക്കൂട്ടില്‍
copyright©joshypulikootil

Sunday, February 3, 2013

തൂക്കു കയര്‍

           
   തൂക്കു കയര്‍


മര്‍ത്ത്യന്റെ കാമനയെന്ന പേരില്‍ 
മാനം നശിപ്പിക്കുമെന്റെ നാട്ടില്‍ 
മന്ത്രിമാര്‍ തൊട്ടിങ്ങു കൂലി വരെ 
മാനം പറിക്കുന്നു കൂരിരുളില്‍ 

കടയില്‍ കിട്ടാത്ത വസ്തുവായ് മാറിയ 
നാരിതന്‍ ദേഹം വിലയ്ക്കെടുക്കാന്‍ 
നാടുകള്‍ തോറും തേടി നടന്നവര്‍ 
നാടിന്റെ മാനം കളഞ്ഞു കൊണ്ടും 

ഏതോ കിനാവിലെ ഭീകരസത്വം പോല്‍
ഏതു നിമിഷവുമവര്‍ വരുന്നു 
അറിയാതെ കരയുന്ന നാരി തന്‍ നാസിക 
അമര്‍ത്തി പിടിക്കുന്നു ആക്രാന്തത്താല്‍ 

അമ്മയും പെങ്ങളും ആരെന്നറിയാത്ത 
ആളെ ഭരിക്കുന്ന നീതി സത്വങ്ങള്‍ ...
ആയതിന്‍ മുന്നിലേക്കവരെ വരുത്തുവാന്‍ 
അണിയിപ്പൂ കറുത്ത മുഖംമൂടികള്‍ 

കാളുന്ന വയറിന്റെ നൊമ്പരമറിയാതെ
കാമം തുളുമ്പുന്ന വദനമോടെ 
കാശിനായ് വാദിക്കും വക്കീലുമാരോ 
കറുപ്പിനാല്‍ മൂടുന്നു നീതി തന്‍ കണ്ണുകള്‍ 

നീതിശാസ്ത്രത്തിന്റെ നാരുകള്‍ കീറി 
എഴുതുന്നു പുത്തെന്‍ കുറ്റപത്രങ്ങളും 
നാരീ നിനക്കായ് കെണിയൊരുക്കുന്നവര്‍ 
നാറിയ രാഷ്ട്രീയ പിന്‍ബലത്താല്‍ 

ഒരു മുഴം കയറിനാല്‍ ജീവിതം തീര്‍ത്തു
സോദരീ നീയങ്ങു പോവുമ്പോഴും 
നിന്നുടെയോര്‍മ്മയില്‍ വിങ്ങുന്നു 
അമ്മതന്‍ മാതൃത്വം എന്നുമെന്നും 

കസബിനെ തൂക്കിയ കയറിന്റെയറ്റം 
ആടുന്നു നിങ്ങളെ നോക്കിയിപ്പോള്‍ 
സോദരിമാരുടെ മാനം നശിപ്പിക്കും 
നീചരാം മര്‍ത്ത്യരേ നിങ്ങള്‍ക്കായ് ....


ജോഷി പുലിക്കൂട്ടില്‍
copyright©joshypulikootil 

Tuesday, January 1, 2013

നശ്വരം - അനശ്വരം





ഉരുകുന്ന മെഴുതിരിയെന്നപോലെ 
യുരുകുന്നെന്‍ ഹൃദയവുമിന്നിവിടെ
മനസിലെ നൊമ്പരം മായ്ക്കുവാനായ് 
ഞാനണിയുന്നു  പുഞ്ചിരി മുഖതാരിലായ് 

കണ്ണീരിലുപ്പിന്‍ രുചിയറിഞ്ഞെന്‍  
നാവിന്റെ സ്വാദെല്ലാം പോയ്‌ മറഞ്ഞു 
എന്തിനെന്നറിയാതെയെന്നുമെന്നും 
അന്നം മുടങ്ങാതെ കഴിച്ചിടുന്നു 

പാമരം പോയൊരു തോണി പോലെ
പൊട്ടിയ പമ്പരമെന്ന പോലെ 
അലയുന്നു ഞാനിന്നീ മരുഭൂമിയില്‍
കടിഞ്ഞാണില്ലാത്ത അശ്വമായ് 

ഒരുവേള എന്‍മനം പതറിയപ്പോള്‍ 
ഓര്‍ത്തല്ലോ അനശ്വരനായിടുവാന്‍
അതിനുള്ള വഴി തേടിയലഞ്ഞിടുമ്പോള്‍ 
അരികിലായ് നില്‍ക്കുന്നു സോമരസം 

മധുപാനം ചെയ്യുന്ന വണ്ട് പോലെ 
മഴവില്ലിലാടുന്ന മയിലു പോലെ
മനസിലെ നൊമ്പരം മറച്ചീടുവാന്‍ 
ആ മധുപാത്രത്തില്‍ ഞാനലിഞ്ഞുവല്ലോ

നശ്വരമായൊരു മുക്തി തേടി 
നാശത്തിന്‍ പാതെ ചരിച്ചിടുമ്പോള്‍
അരികിലായെത്തുന്നു യേശുനാഥന്‍ 
അറിയുന്നു ഞാനന്നാ പരമസത്യം

സന്തോഷ സന്താപം  മിന്നി നില്‍ക്കും 
സമീക്ഷയാണീ ജീവിതങ്ങള്‍ 
വരദാനം കിട്ടിയ ജീവിതമോ 
വെറുതെ കളയുവാന്‍ നാം അര്‍ഹരല്ല.

 ജോഷി പുലിക്കൂട്ടില്‍ 
copyright©joshypulikootil 

Monday, November 12, 2012

അകലങ്ങളിലുള്ള തമ്പുരാനേ

അകലങ്ങളിലുള്ള തമ്പുരാനേ 
അരികിലായി നീയിന്നണഞ്ഞിടെണേ
ആരോടും പറയാത്ത നൊമ്പരങ്ങള്‍ 
ആരുമറിയാതെ പങ്കുവയ്ക്കാം 

മനസിലെ ദു:ഖത്തിന്‍ ഭാരമെല്ലാം 
മാതാവിന്‍ മടിയില്‍ ഞാനിറക്കിടുന്നു 
നിന്നുടെയമ്മ തന്‍ ചാരെ നില്‍ക്കും 
എന്നെ നിന്‍ സന്നിധി ചേര്‍ക്കു നാഥാ 

ആഹ്ലാദചിത്തനായി അരികിലെത്തി
ആനന്ദ ഗീതികള്‍ പാടിടാം ഞാന്‍ 
മാലാഖമാരുടെ വാദ്യങ്ങളാല്‍ 
മാനവരാശിയതേറ്റു പാടും 

മനസിലെ നൊമ്പരം നീക്കി നാഥാ 
എന്‍ ചിത്തം നിന്നോടു ചേര്‍ക്കു നാഥാ 
തവതിരുതണലില്‍ ഞാനെന്നുമെന്നും 
സുവിശേഷ ഗീതികള്‍ പാടിടട്ടെ 


ജോഷി പുലിക്കൂട്ടില്‍ 
copyright©joshypulikootil